Gisapupo ko kining mga larag nga dahon sa kasakit
Ug gipupo ko ang mga gihay sa maamyong pulong gikan sa langit.
Aron igasa duyog sa mga pangagho
uban sa dangoyngoy ug bakho.
Ang pagbaliklantaw sa usa ka pait nga kagahapon
Daw gisamaran ning pagbating namalandong.
Ug nangalangkat ang gamot sa balatian
diha sa nag-ungbangol way katugkaran
Ang hagulhol sa budhi dili mapugngan sa pagbuhagay
Uban sa bul-og sa luha nga anam nga midagayday
Nagpaanod uban sa nagsulog nga kahiladman
Sa gugmang tinamay sa kapalaran...
No comments:
Post a Comment